鄧洢玲（阿旦）同梁梓禧（Roland，前名梁奕倫）最近為ViuTV開拍新節目《晚吹——啪啪聲，太好聽》，呢個係性talk show，尺度好大膽，節目將於下周日晚上11點半首播。兩位主持專揀率性嘉賓，現年66歲邵音音同袁嘉敏等都暢所欲言，音音姐仲大爆當年登台後，被人灌醉帶上房嘅經歷。
32E嘅阿旦谷咪倒奶出鏡，阿旦噚日喺電話度話：「節目每集唔同主題，會講AV、高潮同自慰等。」阿旦仲話學到好多性知識：「原來自己缺乏性知識，以前最多喺性教育時學或體驗，又或男朋友教。」阿旦幾時學以致用？佢笑言：「將來老公有幸福啦。」
邵音音被三男帶上房
阿旦大讚音音姐講嘢最爆，佢話：「音音姐嗰集主題講鹹濕，佢自爆試過登台後俾人灌酒，跟住三名大漢帶佢上房，幾乎出事。」據知音音姐事後係醒目解圍。袁嘉敏嗰集就講睇AV，阿旦仲話見識過逾萬元仿真Mary：「以前興吹氣Mary，𠵱家做到真人咁，皮膚係矽膠，關節仲郁得。」
撰文：馮仁昭