外籍練馬師向來重視假期，但方嘉柏這天禮拜天未光已現身，摸黑在沙田馬場睇馬，原來主要為了觀看「勝利名星」出操，而此駒由助手出試前，方嘉柏主動走出烽火台外，向助手交帶操練指示，動態非常緊張。
「勝利名星」將跑周三(7日)快活谷四班1200米，此駒上季三歲服役第二仗，已能拼入亞軍，可見有一定質素，唞暑後馬兒更為成長。上月30日「勝利名星」由潘頓試大閘，馬兒走勢強勁，跟放直路加速趕上勝出，52分四班嘅「勝利名星」，竟能力挫評分比佢高一倍105分嘅一班馬「醒目名駒」，足以證明狀態有水準，難怪方嘉柏今朝咁上心，犧牲假期亦要睇「勝利名星」，隨時成為方廐今季開齋馬。