學生哥9月開學，休息接近一年嘅翁世權（Simon）亦重出江湖了。
渣打（2888）舊年10月結束窩輪及股票衍生工具業務，當時擔任認股證及牛熊證銷售主管嘅翁世權（Simon），無奈離開工作咗5年嘅渣打。
之後Simon經常周遊列國遊玩，不時喺facebook放閃，上載同屋企人滑雪、陪囝囝露營嘅相，今年6月仲去咗歐洲睇波。期間雖然有傳佢會重投輪場，但一直未有消息確認。
直至日前，Simon喺facebook以英文留言，話2016年9月係佢悠長假期嘅結束，亦係佢新旅程嘅開始，仲話對未來嘅挑戰感到振奮，似乎暗示即將投入新工作。
華華即刻向Simon求證係咪重出江湖，佢話，的確係返咗新工，但唔肯講係咪做番老本行窩輪，只係話新工作係屬於金融範疇。佢咁口密，係因為新公司仲申請緊牌照，希望一個月後搞掂晒，到時多啲事情可以公佈天下。