做乜都要講時機，包括手機電池爆炸。Galaxy Note 7接連發生電池爆炸，搞到三星上星期要全球回收手機，有口痕友就話，Note 7早唔爆，遲唔爆，偏偏揀正蘋果公司今個星期推出iPhone 7前先嚟爆，對蘋果有利咁話。
唔少分析指，三星今次召回Note 7，正正係蘋果星期三發佈新iPhone嘅好機會。市場研究公司Counterpoint Technology預計，Note 7電池爆炸後，唔少三星用家會轉投新iPhone懷抱。Drexel Hamilton分析員仲認為，Note 7被燒焦嘅圖片同視頻深深傷害三星，可以進一步提升蘋果品牌形象。
其實市場早前有風聲，指iPhone 7變化唔大，令到大家對蘋果新產品發佈會冇乜大期望，Note 7事件後，大家反而又關注番iPhone 7，果真係世事如棋。