這天沙田馬場晨課，有兩位明星出現，七點鐘左右，草蜢嘅蘇志威帶埋老婆劉小慧響烽火台會合練馬師沈集成，走上三樓睇佢隻愛駒「駿王」喺大圈由助手策騎與「四季旺」拍跳兩段，蘇老闆揸住望遠鏡，嗰樣鬼咁認真，似乎對睇操有啲心得。
蘇志威兩公婆睇完愛駒拍跳，隨即走去飛機坪接馬，兩公婆係咁摸隻馬嘅馬頭，蘇老闆仲深情地錫咗白鼻嘅「駿王」一啖，十分之肉緊呀。之後騎師羅理雅行埋嚟，由沈集成介紹呢位好手畀蘇老闆認識，大家仲傾咗好耐，看來羅理雅大有機會取得「駿王」嘅帥權。
蘇志威第一次做馬主，自然特別緊張，「駿王」係3歲美國自購馬，評三班72分，美國跑過8次得1冠2亞1季2殿，曾喺1700米膠沙地表列賽加州打吡跑第二，即管睇睇「駿王」稍後首次在港上陣，會唔會為佢哋帶來驚喜。