正所謂「衰開有條路，天天都煩惱」。利物浦嘅克羅地亞中堅洛夫雲戴綠帽經已好慘，仲要因一宗綁架案要助查。話說之前同洛夫雲老婆安妮達有一腿嘅林木工人杜比歷，原來係有黑社會背景；由於估計洛夫雲有700萬鎊身家，杜比歷諗住等安妮達同洛夫雲離婚之後就會分到就350萬鎊，然後再呃晒安妮達啲錢。點知佢個計劃被安妮達個死黨杜絲知道咗，於是杜比歷就夾咗杜絲去咗個森林，仲用槍指住佢個頭，恐嚇佢如果爆響口就殺死佢同埋佢個仔。好彩杜絲走得甩，之後再報警，克羅地亞警方亦證實有搵洛夫雲協助調查一宗綁架案。洛夫雲又戴綠帽又俾差人搵上門，如果第日有機會嚟香港，我求大俠會提議佢應該去車公廟轉轉運囉。另外，洛夫雲嘅利物浦隊友沙迪奧文尼（小圖）同佢一樣黑仔。文尼日前喺塞內加爾贏納米比亞2:0嘅非國外受傷，踢咗66分鐘就被換出，希望佢冇乜大礙啦。