【本報訊】做過花旗、摩根大通的靚女前banker（銀行家）王家琦，加入鷹君（041）旗下的冠君產業信託（2778）僅兩年半已坐正做行政總裁（CEO），更按其經驗將旗下中環花園道的冠君大廈（前花旗銀行廣場）配套大執位，打造成「中環人」最想返工地方，完成十年心願，在大廈加設酒吧！
王家琦指，當日由摩通轉職至花旗，上班地點由遮打大廈改至花園道，第一身感受是公司附近「連搵杯嘢飲都無」，但「banker一定要飲酒，唔飲酒無生意傾，好大壓力時要relax都係飲嘢，要networking（交際）都係飲嘢」。
為冠君大廈增設酒吧
王家琦在冠君大廈返足十年工後，今年終趁大廈翻新時加入酒吧，並陸續整理其他細節，如變更電梯程式在繁忙時間上落加快，方便銀行租戶需要，就連其煙民前銀行家同事的要求亦一一滿足，「（冬天）食煙有埋暖燈，夏天有風扇，有櫈坐」，加上增設健身中心、輕食、其他餐廳等。
近年金融業不景氣，好多投行要慳錢，她亦趁機引入全新租戶，將部份樓面打造成「共用工作空間」。
種種微調亦間接帶動大廈出租率由2014年的約75.4%，回升至今年逾95%，呎租亦由77元升至逾百元。
然而這位中環靚女不只在中環、金鐘出沒，亦非常貼地，皆因冠君旗下有中檔場朗豪坊。「以前我只識金融，唔識行場、租務，經驗係跟李生（前行政總裁李澄明）慢慢浸出嚟」，加上她本身「望落係banker，但好喜歡行民生嘢」，雖然舊居在九龍站，卻老遠「去文華新邨食『老趙（越南餐館）』。
朗豪坊換租客擴客源
面對零售轉差，她則頻頻幫朗豪坊換租客，新近引入全港首間認證LEGO Store，將商場客路擴闊至家庭客。但她直言，換客只是為了增人流幫助租客生意，故暫不會再增同類商店。她指，公司要保持朗豪坊「潮場」特質，因李生曾講過，後生仔係因「朗豪坊有女」才流連商場，故想「Keep番呢個感覺，啲女唔好變咗小妹妹」。
加上朗豪坊有班中學生客，若「放學想Hea，但Hea Hea吓撞到阿媽，就梗係唔會想係呢到HEA」，故會確保不變成「媽媽場」。