新世界發展（017）第三代接班人鄭志剛（Adrian）一向鍾意藝術，成個集團都講Artisanal Movement，估唔到就連佢哋推出嘅月餅都要有藝術味。
月餅包裝通常十分傳統，四四正正，新世界旗下藝術商場K11今年就搵本地設計師，設計一個長方形月餅禮盒，唔講以為係聖誕禮物盒，入面似係放咗頸巾、冷衫，點都唔似放咗兩個雙黃白蓮蓉、4個金莎奶黃月囉。成個包裝嘅色調感覺仲姣姣哋。
上網睇資料，原來設計師以月亮嘅圓缺變化為設計靈感，用不同形態嘅圓形花紋拼湊出寓意一年365日嘅月亮印記，包裝用色就「大膽」採用時下最流行嘅馬卡龍粉色系。
都說藝術這回事，真係好個人口味，好主觀，不過有別於傳統，都唔錯嘅。