噚日嘅投票結果,據知影響特首梁振英嘅去留;關乎到政途,梁振英點會唔緊張?佢噚日一朝就同太太到所屬票站投票,冇發表惹火言論,可能唔想益咗反梁陣營,但佢同太太都以藍衫亮相,可能係為咗表明撐藍絲。
林鄭着「欣賞香港」Tee
唔知夾埋抑或咁啱心有靈犀呢?噚日同樣到票站投票嘅政務司司長林鄭月娥,亦以鮮藍色外套現身,裏面仲着住件「欣賞香港」運動嘅Tee?呢個配套,似乎係好有心思。
嘩,真係夾到呢……同林鄭一樣喺山頂票站投票嘅律政司司長袁國強,深色外套內,同樣着咗藍色嘅恤衫喎。
呢一種藍調,喺選舉日出現,肯定別有一番意思。唔知最終結果,啱唔啱佢哋心意?