奧斯爾喺德國國家隊原本着八號，不近排接替退役嘅普多斯基件10號波衫，正式成為德國10號仔。呢位27歲球員效力嘅阿仙奴，啱啱喺轉會窗關閉前將本來着10號嘅韋舒亞借向般尼茅夫，令到件10號波衫懸空咗，於是佢就表明好想成為兵工廠10號仔。家陣喺阿仙奴着11號嘅奧斯爾話：「家陣件10號冇人着，我真係好想要囉。呢個號碼同我以及我嘅位置都襯到絕。我好喜歡10號，施丹、馬勒當拿同埋比利都係着10號，所以我都想做10號仔。」奧斯爾之前喺皇家馬德里效力三季，頭一季着23號，但之後兩年改着10號；但由於韋舒亞未正式離隊，奧斯爾最快要到下季先可如願做阿仙奴10號仔囉。另外，新加盟基爾禾嘅荷蘭中場莊拿芬迪根斯文就相當另類，居然揀咗一號波衫。