我求大俠身邊有好多朋友都唔鍾意睇足球表演賽，話冇競賽意義嘅比賽好假同好流，不過，我就覺得好多時要睇戲碼同人腳囉！好似喺上星期六阿仙奴明星隊對意大利嘅AC米蘭傳奇隊喺阿聯酋球場踢咗場慈善賽，就娛樂性豐富，其中兵工廠嘅尼日利亞前鋒簡奴就再次展示佢嘅「笨小孩」本色㖭！
呢場比賽係為阿仙奴慈善基金籌款嘅，雖然兵工廠兩大射手伯金同埋亨利分別因為喺阿積士同比利時國家隊嘅事抽唔到身出席，不過其餘名宿好似皮利斯、比堤、龍格保同埋施文等都全部在陣，加上AC米蘭傳奇隊亦有哥斯達古達、迪西里、波班同韋利呢啲星中之星，所以賽事仍然睇頭十足。
球證點人頭先知「大相公」
不過勢估唔到，未開波一眾球星都已先俾阿仙奴嘅簡奴搶晒鏡頭。因為當準備開波，球證韋比同兩隊點人頭時，竟然發現阿仙奴「大相公」，12個打11個！原來係40歲嘅簡奴冇聽清楚領隊雲格嘅訓示，唔知道自己踢後備。結果要勞煩隊友兼中場嘅基拔圖施華送佢出場，而見到咁嘅場面，全場都爆笑。不過，簡奴好快就以後備身份入番場，仲連中三元，協助阿仙奴明星隊以4:2擊敗AC米蘭傳奇隊，辳完之後就威番晒！
名將個個變晒樣
至於賽事嘅其餘焦點，就有以前sell型sell瀟灑嘅阿仙奴法國中場皮利斯，竟然鏟光晒啲頭髮，加上身形發福，真係同「瀟灑」呢兩個字差好遠；反而另一法國中場比堤就仲係長髮飄飄，相信令唔少中年男士既羡慕又妒忌。AC米蘭傳奇隊方面，一眾型男好似哥斯達古達咁都好keep得吓，反而早前仲話想操弗復出踢波嘅前鋒韋利，就繼續身形暴脹。另外，AC米蘭傳奇隊嘅前鋒迪肯尼奧亦喺場上自嘲，比賽期間同阿仙奴嘅後衞溫特本重演自己當年效力錫周三時推跌球證嘅事件；總之，睇到在場觀眾拍爛手掌，而今場賽事仲為阿仙奴慈善基金籌得100萬鎊（約1,031萬港元）㖭！
