曼城領隊哥迪奧拿將中場耶耶托尼打入冷宮，仲棄用得好徹底，冇將佢列入歐聯大軍名單。不過耶耶唔同赫特，佢已經33歲，基本上乜冠軍都拎過，可以話係等掛靴一樣，呢年hea住𢭃22萬鎊周薪都咪話唔爽！佢經理人都講明，耶耶好樂意留喺曼城到完約。
哥帥棄用不意外
曼城官網上周五公佈歐聯大軍名單，由於球隊外援多、本土青訓少，所以來自科特迪瓦嘅老臣子耶耶就冇份，嚟緊呢半年嘅周中可以睇吓波，唔使落場踢歐聯。如果係有雄心壯志嘅球員，當然會想離隊啦，但耶耶係拎盡球會榮譽嘅夕陽老將，歐聯冠軍又攞過，真係冇乜所求，係想要份高人工合約養老。耶耶經理人就話佢好樂意留隊，「耶耶係個好專業嘅球員，佢有權話離隊，但我哋傾完後決定留低。哥迪奧拿可能諗到耶耶得番一年合約，所以想畀機會其他球員踢歐聯。」
耶耶家陣喺曼城每周𢭃緊22萬鎊人工，同阿古路並列隊內最高薪，一年過千萬鎊，即係大概港紙1.2億。唔使踢歐聯，間中喺聯賽做吓後備，頂多帶吓年輕球員踢英聯盃，咁就袋1.2億！如果悶悶地，咪搵曼聯嘅舒韋恩史迪加一齊happy吓啦，反正小豬都冇入曼聯歐霸盃大軍名單，大家今季都應該唔使點踢，齊齊做高薪閒人。耶耶被哥迪奧拿棄用，都唔係意外嘅事，當年佢喺巴塞隆拿都被哥帥踢走過一次，最後嚟咗曼城。英國《天空體育》就揀咗個哥迪奧拿棄將最佳11人（見附表），被兩次拋棄嘅耶耶當然有份，另外同哥帥好大仇口嘅曼聯中鋒伊巴謙莫域亦有入選。
阿古路停三場缺席打吡
耶耶喺歐聯長唞，而阿古路嚟緊半個月就可以專心踢歐聯，因為佢上場聯賽對韋斯咸開踭打人，上訴失敗被罰停賽三場。除咗缺席周六對曼聯場打吡大戰，仲要喺聯賽對般尼茅夫同英聯盃對史雲斯坐波監。冇咗阿古路，唔知哥帥會用洛尼圖打最前，定係畀小將伊恩拿祖擔正呢？至於曼聯亦估計有路爾斯華倫西亞、羅美路同馬高斯盧祖缺席打吡，紅魔主帥摩連奴話佢哋三個踢完國際賽後，禮拜五先返到球會報到，恢復時間得一日，相信唔會搵佢哋打正選。華西係曼聯今季正選右閘，如果佢唔踢得，就要搵菲爾鍾斯或達美安頂上。