昨日講公關靚女A及B送左丁山一盒月餅，當時不以為意，到了下午茶時份，在公司打開睇睇，原來係文華酒店月餅，蛋黃蓮蓉月。體積晒士就係時下流行款式，比半島奶黃月餅大三分一左右，幾啱食，三啖就吞晒。
今年周圍所見月餅，原來係奶黃月餅最多款，唔知係唔係受到半島嘉麟閣奶黃月餅暢銷嘅影響呢？據講今年半島推出迷你榴槤奶黃月餅，售價近九百蚊一盒，認真犀飛利，當然唔係左丁山嗰杯茶，而且榴槤好蝦人食，鍾意嘅視之如珍寶，唔鍾意嘅當佢係貓屎，半島推出榴槤奶黃月餅，固然藝高人膽大，亦要收到貴一貴嚟達到收益目標。
時人樣樣飲食講「健怡」，一於少油少糖少鹽，於是月餅製作設計亦有大轉變，以迎合消費潮流。姑不論冰皮月餅嘞，新式健怡月餅就幾乎全部以奶黃為主，配料就力求新款，例如奇華就推出「蜜餞子薑奶皇月」、「柚子奶皇月」，口味淡淡清香，甜而不膩，又有所謂健康之選──麥芽糖低醇糖奶皇月，選用小麥及粟米澱粉提煉而成嘅麥芽糖醇製造，仲有朱古力奶皇月，伯爵茶奶皇月，茉莉香片茶奶皇月等等，款式繁多。
文華、半島、奇華、蔡和平等等奶黃月餅吃過之後，左丁山還是鍾意傳統月餅，即是最不健康之選！半島最不合乎性價比原則，蔡和平嘅奶黃月餅比較冇咁甜，現在嘅一般蛋黃蓮蓉月總係差少少油，大概係已經為咗照顧市場大眾唔要肥嘅口味，唔敢用豬油之故。因此奇華陳皮紅豆沙月相形之下，最有特色。一位住在大澳嘅親戚知道左丁山鍾意食月餅，特登乘夜揸車出嚟送上一盒五仁月餅，問佢點解咁緊張，佢話：「大澳有間老餅舖美珍，手製五仁月餅，今晚五點幾新鮮出爐，無任何添加劑，兩日後就過期，我立即搶購幾盒，你快啲食呀，有時限㗎。」咁唔話得，晚飯後到咗十點，立即食一個，真係幾正，可惜舖頭在大澳，都幾難入去搶購。老咗就鍾意食五仁月，五仁者，即杏仁、桃仁、花生仁、芝蔴仁、瓜子仁，有𡁻頭兼且夠營養（桃仁、杏仁等皆有防氧化、活腦功效），配上豬肉粒，少許火腿，實在好食。勤力德送來一盒粉嶺仁利餅舖嘅五仁月，用最傳統方法製造，成間屋只有左丁山一個人享用！市面容易買到嘅金華五仁月，以奇華出品較好，蔡瀾推薦嘅澳門鉅記五仁月亦係正嘢，但愈夠傳統嘅月餅，就愈不「健怡」，未來日子恐怕愈來愈難得一見咯。