行船跑馬三分險，這天沙田馬場開鑼賽原本順風順水，不過跑到第四場，卻有何澤堯在馬匹行圈時，因座騎「香江永勝」發脾氣，何澤堯整傷腳退下火線入院，跟手第五場又有蔣嘉琦騎蘇偉賢馬房「真好漢」在直路中段墮馬，猶幸一對師兄妹均冇大礙，嘉琦BB還可繼續於餘下賽事策騎。
講番第五場四班1400米，呢場1號馬掛頭牌出賽的沈集成馬房之「阿甘」夥拍羅理雅後上一攻而破，此駒打破近兩季齋缽，單Win及組合獨贏A2，分別派66.5及30.5元，騎練之前已分別於第二、三場勝出「紅牡丹」(羅理雅)及「永旺年年」(沈集成)，至此各自宣告起孖做開鑼日主角。
今場跑第二係「帝聖之寶」，鞍上人新見習騎師嘉琦師弟巫顯東在港首季出賽，同師傅沈集成之「阿甘」串Q，成為一時佳話，三、四名則由「甜統」及「超甜橙」瓜分，四重彩派二萬四千蚊多啲。