「請支持X號！」、「請投X號一票！」呢排行出街周不時聽到呢啲口號，無他，聽日就係立法會選舉。咁啱英超周四就公佈新一季名單，唔少新兵都「真‧落實」新號碼，其中阿仙奴嘅西班牙新兵前鋒盧卡斯佩雷斯着九號波衫；「廠9」之前雖然有安歷卡同蘇加呢啲勁人着過，但自從謝菲斯「加持」後就淪為瘀血號碼，廠迷真係希望佢有免疫力先得嘞。
以英格蘭傳統，九號好多時都係球隊前鋒甚至首席射手嘅號碼，舒利亞就係經典九號仔。阿仙奴昔日都有唔少出色九號仔㗎，好似法國前鋒安歷卡幫兵工廠贏過英超冠軍，2000年以2,200萬鎊賣去皇家馬德里，仲幫球隊賺一大筆，成為領隊雲格最成功嘅轉會操作。不過，雲格最失手之作亦係九號仔，2001年以800萬鎊由愛華頓收購前鋒謝菲斯，仲吹到「禁區之狐」咁勁，點知加盟後完全唔掂，喺聯賽淨係幫阿仙奴入咗四粒，即係200萬鎊一粒；謝菲斯越踢越沉，之後去澳職紐卡素噴射機都冇料到，2013年仲收埋山。雲格當年呢個收購，到今時今日仲俾人恥笑。
思鄉、斷腳災難浪接浪
講番呢十幾年嘅阿仙奴九號，都真係衰多過好，好似「電單車」雷恩斯因為言語不通加上思鄉，好快就返西班牙；克羅地亞前鋒伊度亞度達施華原本都唔錯，但恐怖斷腳後返唔到高峯。至於南韓天才前鋒朴主永，我求大俠有理由相信兵工廠係收咗南韓公司贊助先至收購佢，買番嚟直頭冇用過咁滯；德國前鋒普多斯基叫做有啲作為，但佢舊年離隊後亦留低咗呢件九號。27歲嘅盧卡斯唔信邪做「廠9」，佢話細細個就睇阿仙奴比賽，好鍾意韋拉、皮利斯同廠9前輩兼西班牙同胞雷恩斯等，又話比利連、辛迪卡索拉等西班牙兵會幫佢適應倫敦生活；佢亦趁呢個國際賽期返番前球會拉科魯尼亞道別，話拉科永遠係佢嘅家。阿仙奴另一新兵、德國後衞梅斯達菲就會着20號。
講起號碼，英超其他新兵都落實號碼，好似車路士回購嘅巴西後衞大衛雷斯，就着唔番離隊前嘅四號，因為俾法比加斯拎咗，新一季惟有着30號；曼城門將哥迪奧巴禾就會取代離隊嘅赫特，成為「藍月亮」一號門將。
