特首戰喺立法會選舉結束後會轉入直路，至今係大熱、有力阻梁特連任之路嘅財政司司長曾俊華，再獲中央祝福機會，佢噚日啟程到杭州參加G20峯會。呢次峯會國家主席習近平都會出席，一班花生友猜測緊，到底今次鬍鬚曾北上，會唔會再有同習近平握手嘅機會？哪管只係俾佢掂一掂手指尾，跑馬仔行情都肯定再上升。
鬍鬚曾噚日上機前被問到會唔會同國家領導人會面時，話暫冇此計劃，但若然領導人或有任何官員查詢香港情況，佢非常樂意解釋喎。至於係咪競逐下屆特首，佢回應：「呢個我都講咗好多好多次，咁我答你，就係如上，如上同我以前講嘅一樣」，唔通唔想太早洩露天機？