美國演藝學院（Academy of Motion Picture Arts and Sciences）宣佈今年The Governors Awards（奧斯卡榮譽獎，近年稱奧斯卡終身成就獎）得獎人選，香港影星成龍成為得獎人之一。有網民話「咁大哥響度（喺）電影入面成就係有目共睹嘅，雖然銀幕外面講好多『會爆炸』之類嘅至理名言」，亦有人指「的而且確佢以前d（啲）戲係幾好睇既（嘅），係近十年做臭左（咗）自己」，有讚又有彈，相信算係近年最具「娛樂性」獲獎人。
由1920年代開始，此獎項會頒發畀奧斯卡獎項沒有涵蓋領域中的傑出人士或團體，後來逐漸演變成頒畀終身為電影事業貢獻人士。過往獲頒呢個獎嘅都不乏大家熟悉的名字：
1920年代：差利卓別靈、華納兄弟
1930年代：愛迪生（榮譽會員）、華納迪士尼、佐治伊士曼（榮譽會員，柯達公司創辦人）等
1940年代：英國信息部（United Kingdom Ministry of Information）、Bob Hope（終身會員）等
1950年代： 二十世紀福斯影片公司、博士倫公司等
1960年代：德雷斯特（真空管發明者，被譽為「無線電之父」）、Yakima Canutt（著名特技演員，特技安全設備開發者）
1970年代：Ben Burtt（《星球大戰》音效設計）、Edward G. Robinson等
1980年代：亨利方達、芭芭拉史坦威、保羅紐曼等
1990年代：黑澤明、蘇菲亞羅蘭、查克瓊斯（華納兄弟導演，著名作品有《威利狼與嗶嗶鳥》）等
2000年代至今：羅拔烈福、彼得奧圖、宮崎駿等
作為首位獲此榮譽嘅華人，查實成龍都的確拍過唔少叫座力強嘅作品，1998年《我是誰》同2001年《特務迷城》票房都超過三千萬，但近十年產量未算太多。有外國媒體指此舉令奧斯卡「變得更多元化」，到底係令電影抑或電影資金變得更多元化，就見仁見智喇。
記者：黃樂雯
