4年前，前學民思潮召集人黃之鋒有份發起反國教運動，嗰一年佢15歲，呼籲市民票投反國教嘅立法會候選人，「去幫我投嗰一票」；4年後，學民解散，之鋒作出同樣呼籲，對象換咗佢嗰代成長嘅年輕人，而佢今屆亦係首投族，相信周日投嘅一票，會扭轉選舉結果。
籲延續傘運精神
4年後嘅之鋒，身為香港眾志秘書長，佢話遺憾當年未夠秤投票，「始終覺得入去票站投一票，可以扱個印仔，你會有一種充權嘅感覺」。今屆終於有票投，佢話好明白要首投族投票係非常困難，尤其年輕人，因為網上表態容易，實際行動就束手無策，「其實可能好根本原因，就係佢哋都唔知個票站喺邊」，但佢強調，非建制守唔守得住立法會三分一議席，好睇幾多首投族出嚟，希望年輕人延續傘運精神，以票改變香港嘅命運。