今屆立會選舉好多奇人異士，令大家「刮目相看」，例如喺新東參選嘅梁粉陳玉娥（圖），憑住獨特嘅造型，俘虜唔少網民嘅「歡心」。
洋名Estella又叫Jenny
大家又知唔知，原來娥姐有兩個英文名？估唔到哩，佢除咗叫做Estella，同時亦係Jenny。
點解要有兩個英文名呢？莫非其中一個係行走江湖用，以免太多狂蜂浪蝶應接不暇？似乎八方估錯咯！
噚日喺商台選舉論壇，主持人好關心娥姐兩個洋名之謎，問佢點解啦，娥姐就話喎，Estella係佢passport name，而Jenny就係佢嘅working name。咁點解唔可以將passport name用埋做working name？佢話因為Estella呢個名比較難記喎！
其實娥姐另一出眾之處，係佢相當明顯嘅梁粉身份；主持人問佢咁撐CY，咁CY有冇多謝佢先？娥姐似乎唔多介意一往情深無乜回報，佢話呢，「我覺得唔需要，我真係為香港人服務」。梁振英有呢種癡心情長劍粉絲，真係羨煞旁人，佢仲大讚CY係完美㖭！該區其他參選名單，請參閱本報立會選戰網站 http://hk.apple.nextmedia.com/legco2016/region 。