看不見亦摸不到，憑唇讀苦學嘅曾芷君，當年以3科5**佳績獲中大繙譯系取錄，佢堅毅不屈嘅精神，感動唔少香港人。唔經唔覺芷君已升讀大學4年級，小妮子計劃畢業後到海外升學，繼續以一片輕唇吻遍知識汪洋。中大新亞書院院長黃乃正話，以芷君成績申請獎學金完全冇難度，「完全唔使愁」。
院長同八方講，芷君喺中大成績標青，「GPA3.8、3.9，就嚟爆燈咁嘅情況，所以佢讀到咁好，去外國讀書應該好多獎學金㖭」。學院下周一先開學，佢會同芷君同埋佢媽媽了解情況，「傾吓佢心目中點諗，想去邊個國家讀書」。院長又話，芷君有心服務番一樣有身體缺陷嘅同學，可能將來讀Social Work都唔定，「以佢嘅資質，我相信讀乜都冇問題」。
芷君天生弱視兼弱聽，觸感也有缺陷，自創用嘴唇讀點字，雖然困難重重，但比別人更努力學習，仲做埋新亞年輕學人。