內地男星黃曉明一句「而我不知道陳偉霆是誰」，令後者俾網民恥笑到𠵱家。黃曉明，你終於有接班人啦！競選連任金融服務界議員、喺股市打滾幾十年嘅張華峰，竟然唔知道丁蟹係邊個！
日前港台請咗3名金融服務界議員出席選舉論壇，主持開場先問一條假設性問題：「如果我係丁蟹」。張華峰第一個作答，話要「了解佢嘅業務性質，了解佢工作範疇，了解佢嘅專長。知道佢嘅專長，至可以引導佢發揮專業，為社會服務，我希望對丁蟹呢個人，有多啲認識，我暫時對佢認識唔深，希望有機會睇多啲關於佢嘅新聞，喺佢度學到佢嘅經驗、專長。」
稱發揮驚人想像力同應變
聽到呢度，已經feel到有啲唔妥。主持再追問張華峰信唔信有「丁蟹效應」，張華峰繼續自由發揮：「丁蟹效應，有好有唔好，好嘅方面，大家要學習；唔好嘅，大家要改變，呢個就係我對人對事嘅睇法。」噚日班網民，尤其金融業界嗰啲笑到碌地，話呢位現任議員堅離地。另外兩位候選人徐聯安、詹劍崙答案都中規中矩，冇乜特別。
張華峰不敢怠慢，即刻fb出post，解釋自己一直都知乜係秋官效應，但佢真係冇睇《大時代》，唔知道秋官就係丁蟹，當場惟有「發揮我驚人嘅想像力同臨場應變」，抱歉引起誤會咁話，選民收唔收貨，好快有分曉。
李八方
mailto:[email protected]