世盃外亞洲區12強賽噚晚展開，A組嘅「龍之隊」中國一度輸到0:3，雖然之後連入兩球，但仍然作客以2:3輸畀「太極虎」南韓，喺呢場龍虎之爭入面嘅罪人首推「烏龍的傳人」鄭智。
國足呢場擺到明係死守，排出4-5-1陣式，如賽前報道所料，鄭智墮後同李學鵬、馮瀟霆兩個恒大隊友一齊踢中堅，希望可以封鎖禁區。點知真係人算不如天算，你以為鄭智踢中堅會穩陣啲，原來失波就關佢事。21分鐘，右閘張琳芃喺禁區邊犯規，南韓獲得罰球，效力熱刺嘅孫興民斬入禁區，一片混亂，南韓前鋒池東沅首先掂到個波，但最後省中鄭智隻腳入網。呢位36歲老將擺烏龍，南韓領先1:0。
講句公道說話，國足喺上半場嘅生波守得幾穩，但死球就好似冇練過咁。三分鐘後，南韓右路罰球傳中，又被效力奧格斯堡嘅池東沅頂到，柱邊出界。喺上半場中後段，國足搶到啲攻勢，但踢單箭頭嘅武磊把握力麻麻。29分鐘，國足反擊，武磊單刀，但佢嘅射門唔夠決斷，被對手中堅洪正好擋出。39分鐘，呢位上海上港射手接應傳中，第一時間窩利抽射又高出。一分鐘後，國足逼到南韓後防誤傳，武磊遠射偏離目標，國足半場落後0:1。
三分鐘追返兩球仍輸2:3
換邊後初段，兩隊勢均力敵，但踢踢吓南韓發現國足右閘張琳芃冇乜電，咁就爆佢嗰邊啦！63分鐘，池東沅左路底線傳中，國足左閘任航睇波但唔睇人，被李青龍後上頭槌頂成2:0。66分鐘，南韓照辦煮碗嚟多球，呢次到孫興民爆落左邊傳中，具滋哲喺尾柱射成3:0。輸到三球，好似激起咗國足嘅戰意，74分鐘先由于海破蛋，三分鐘後，後備入替嘅蒿俊閔射入靚罰球，為國足追成2:3。之後真係龍爭虎鬥，雙方搏槌，國足有任航嘅近射被救出，而南韓亦有孫興民射門被曾誠撲到，最後國足喺12強賽首戰作客以2:3不敵南韓。
日本主場爆冷輸波
A組嘅國足輸畀南韓唔算意外，而B組方面就真係爆冷，主場嘅日本以1:2輸畀阿聯酋。本田圭佑幫日本開紀錄，但阿聯酋靠阿密特卡利連入兩球反勝；至於澳洲就喺主場輕取伊拉克2:0。