《成報》用頭版評論炮轟梁振英同西環引起政圈熱議，但西環不是省油燈，中通社同左報立即開火還擊。中通社報道，《成報》董事局主席谷卓恒涉嫌非法吸收公眾存款1.3億人民幣，被公安機關網上追逃，而《大公報》亦登調查報道，話谷一年前喺深圳機場被刑事拘留。
不過《成報》不單止冇縮，噚日仲喺頭版刊大字標題「不畏懼 說實話」（圖）及兩份聲明，分別係谷否認事件同反駁左報報道，仲繼續開火。
有政界中人同八方講，左報有關谷卓恒報道其實係舊聞，問題係若果谷卓恒真係如左報所講，一年前已被追查，點解谷仍有力喺《成報》開火？唔通西環連《成報》都㩒唔住？或者事件反映出內地不同派系越鬥越激，好戲應該有排都未完。