財政司司長曾俊華又再接受係咪參選特首嘅問題挑戰。由於鬍鬚曾稍後將出席G20會議，習近平更加會出席兼主持峯會，鬍鬚曾被問到席間會否向領導人明志，表達對係咪想做特首嘅意向，曾俊華猶抱琵琶半遮面，「我以往講嗰啲嘢，我相信都幾清楚，我冇咩新補充，我都係講過好多次，我今日仍然係咁樣嘅立場。」
「選特首要有詳細考慮」
早前講過特首係份衰工嘅鬍鬚曾話，特首呢份工當然唔易做，至於有冇心選特首？佢話：「呢個係需要好詳細嘅考慮。」咁都啱嘅，太快表態，擅長搞黑材料嘅人會好快開工。
香港日日都離不開港獨兩個字，會唔會見到領導人講吓「反港獨」呢？佢話滙報香港情況係由特首梁振英負責，但如果有領導人或者中央官員向佢提問，佢非常樂意提供佢嘅睇法。
如果梁振英連任，佢係咪會繼續做落去？佢話未諗過，同埋呢條問題「好假設」。咁幾時會諗？鬍鬚曾話適當時候就會，乜嘢都會係考慮因素，包括立會選舉結果，不過又係嗰句，「𠵱家去到明年嚟講有非常長時間，我有好多機會可以作出深入嘅考慮。」