一年容易又中秋，除咗食月餅、玩燈籠，中秋賞綵燈又點少得？康文署今年會喺維多利亞公園、天水圍公園同大埔海濱公園舉辦中秋綵燈會，尖沙嘴太空館外圍仲有專題綵燈展，主題係「飛奔到月球」，將太空館天象廳白雪雪嘅表面當成月球，咁到底月球背面有啲乜？
科學家答你唔到，設計師就有答案。多次負責設計中秋、新年綵燈嘅設計師鄧崇放覺得，除咗嫦娥同佢座豪宅廣寒宮，月球背面應該仲有UFO同太空穿梭列車，玉兔仲着住太空衣同大家打招呼。
鄧崇放表示，由於太空館嘅外形似月球，想科幻感強啲，所以設計意念就係有關月球過去、現在同未來嘅想像，至於造型傾向卡通化，迎合市場口味。
咁又係，自拍打卡都揀個得意啲嘅公仔影相呃like啦！今晚六點半開燈，想霸位影靚相請早。