噚日9月1號，除咗係新學期開學之外，亦係地產代理監管局為咗打擊無牌代理非法sell新盤，執行新執業通告嘅日子。一班代理由噚日開始，喺一手樓盤銷售點sell盤時，一定要戴證。如果個代理未攞到代理牌，就要掛住印有「非持牌員工」字眼嘅牌，兼有導師傍住先可以做嘢。
為咗重視呢個日子，地監局執行總監、曾有「殺雞女督察」外號嘅方安妮，加入咗地監局超過兩年，一直都比較低調，鮮有帶大隊一馬去巡場，噚日中午就「突擊」巡查「港人港地」新盤啟德1號嘅售樓處，睇吓有冇代理唔守規矩。喺現場逗留15分鐘後，方安妮睇完之後就話滿意情況，全部代理都守法，仲話地監局日日都會去新盤巡查。
不過，今次「突擊」巡查實際前日已經通知晒四大地產代理阿頭，個個都知方安妮噚日會蒲頭，巡查嘅作用成疑。方安妮係以前經常喺公仔箱教人煮餸嘅方太方任利莎二女，噚日睇越嚟越似阿媽，身型都比當差時發福唔少。