前晚德國主場對芬蘭場友賽，係「小豬」舒韋恩史迪加第121場兼且係最後一場國際賽，賽前佢致辭都忍唔住喊，抹咗幾次眼淚先講到嘢。現年32歲嘅小豬同保路西亞公園球場嘅30,121個球迷咁話：「好多謝大家嚟歡送我，我好榮幸可以幫德國比賽。我想同大家講一聲『多謝』。」德國喺呢場小豬告別戰憑麥斯美亞入波同對手擺烏龍而贏2:0，小豬喺68分鐘被換出，正式結束佢12年嘅國際賽生涯。
同日愛爾蘭36歲名將羅比堅尼亦踢佢嘅國際賽告別戰，而且仲入一球，協助球隊喺主場友賽大勝阿曼4:0。喺國際賽上陣146場入68球嘅羅比堅尼賽後話：「我冇後悔選擇退出國家隊，多謝大家令我有18年嘅神奇之旅。」