「校服已經一模一樣，如果連書包都唔有型，點得呀？」每年開學，除了買新書新文具， 各位走在潮流尖端的中學生，最緊張的當然是書包。本地時裝設計師陳刀，在港讀勻大學、中學、小學，你的書包年代，跟他又一樣嗎？
「我經歷過不同的書包年代，我有揹過LeSportsac，亦揹過Boy London；女仔的話， Mandarina Duck同彩Bold（彩色款Lineabold袋）都受歡迎。」佢口中的品牌，當時都不少都索價二、三千元，絕對價值不菲。「Bold袋係好靚的女生會揹的，是一個身份象徵，因為佢有一個鐵牌可以刻上自己個名，大概要二三千元。要放棄很多餐lunch，食公仔麵腸仔，先儲到一個書包返來。」
九十年代要索價二、三千蚊，中學生來講真心唔affordable。要揀入門級，陳刀就話LeSportsac才算王道。「我那時候的零用錢每月只有300元，買一個Le Sportsac大概要一千蚊，寶藍色、黑色、棗紅色都是大熱顏色。」直至1997年中學畢業，陳刀說個這個袋幾乎陪他整個中學生涯，一個袋玩足咁多年，算長情。不過潮流分子身體就算專一，骨子裏亦貪新鮮，不夠水源追新款，看看潮書滿足內心都好。
「我那年代《YES!》是很有型的，我哋要收埋喺櫃桶睇，那個年代佢有介紹呢啲袋，唔只係明星新聞。」當時《YES!》每星期update最新袋款，相信都為學界潮流推動不少；讀大學之後，陳刀依然有留意潮流。「我上一個年代是單肩背的皮袋，大概似現時HeadPorter的Messenger Bag，我後一代就應該是Patrick Cox。」
其實不只Patrick Cox，那年代流行的還有圓筒型運動袋Super-X、「黑超B 」Hysteric手挽袋，「地圖袋」Alviero Martini、曾經贊助大台遊戲節目的品牌Laosmiddle及山系運動品牌Gregory等等。隨着不少品牌於千禧年代後期撤出香港，學生們亦轉投較易負擔的輕熟品牌，如LongChamp、Ralph Lauren等。
時至今日，學生們的返學look就變得越來越輕便，一個Fjällräven Kanken背囊、一個tote bag輕鬆上陣亦無不可，品牌貴與否似乎非首要考慮。「 其實係朋輩言談之間交流資訊，大家就會一齊揹。」中學時的書包，盛載的，似乎是回憶多於課本。
查詢：
（a）LeSportsac 銅鑼灣時代廣場6樓606號舖
（b）LongChamp 中環皇后大道中8號
（c）Fjällräven 香港銅鑼灣Fashion Walk京士頓街2-4號C舖
（d）Dr. Marten's 香港銅鑼灣希慎廣場7樓708號舖
記者：黃樂雯
攝影：陳健邦、周旭文