【本報訊】今年上市的創板股，絕大部份都為全配售，然而下場普遍都是頭一浸炒高後，高位撻生魚咁撻，同樣以配售上市的皇璽餐飲（8300）亦不例外。不過王文威強調，「我絕對唔係啤殼。」
皇璽於8月8日，以0.15元上市，股價首日即炒至3.5元，市值高達70億元！不過股價掛牌翌日已掉頭回落，以8月31日收市價0.173元計，股價雖仍守得住上市價，但已由高位回落95.1%，市值縮剩3.46億元。
提到股價，王文威表示股價由市場決定，「我咁後生，如果我賣咗隻殼我失業㗎啦，我長遠真係想做到佢轉主板。」他又指，「我自願三年唔沽，呢個行為唔似啤殼啦。」根據招股文件，控股股東自願延長禁售期，由12個月延長至36個月，期間亦不會出售股份致失去控股地位。
記者：倪敏慧