小米創辦人雷軍，以參考蘋果Steve Jobs嘅營商方式推出小米手機，被網民奉為「雷布斯」。不過唔知係咪跟車太貼，今年蘋果手機賣得唔太好，連帶小米手機都唔係好得掂，國內出貨量已經俾華為、Oppo同Vivo等本土手機廠商趕過。
買家唔收貨，有傳蘋果就集緊氣，準備喺明年推出一款iPhone 10周年版本，虛擬實境、人工智能、無人車都加緊研發，希望畀要求越嚟越高嘅「果迷」有新驚喜，Wow出聲。
雷布斯就行去另一方向，透過投資唔同嘅初創公司，專攻家電產品，於是今年3月由「雷布斯」大變身，成為「蘇寧男」，親身推銷小米有份投資嘅「米家壓力IH電飯煲」。
小米噚日再公佈新嘅家電產品，登登登櫈，就係「米家掃地機器人」。小米批評市面上嘅掃地機器人，掃唔到牆角，掃一陣又要返去充電，話自己部機續航力高，而且可自行規劃路徑掃地，售價為1,699人仔。
可惜今次雷軍無粉墨登場，冇做真人示範，強烈要求雷軍真人示範囉。