嚟緊星期日就係立法會選舉，有睇開呢個專欄都大約知道小弟嘅立場，個人投票取向就唔多講，不過睇現時民調形勢，應該有唔少新人當選，相信對未來政壇都有新衝擊，點都好，大家唔同立場都冇問題，最緊要下周日做好公民責任齊投票。
歐國盃後唔少歐洲國家隊教練大執位，部份新丁會喺呢輪國際賽登場。幫西班牙拎過世界盃同歐國盃嘅迪保斯基功成身退，由前波圖教練盧比迪古接手。
相信香港球迷對盧比迪古唔算太熟識，不過西班牙足協睇中佢，應該係因為佢由2010年後已經教西班牙青年軍，仲贏過U19同U21歐國盃，當中嘅子弟兵，好似艾華路莫拉達、堤亞高艾簡達拿、謝斯洛迪古斯等，唔單止已經成為大會主力，唔少都入選埋大國腳。唔使背負衞冕世界盃呢個銜頭，西班牙亦都開展新一頁，對新帥盧比迪古及一眾新兵都有減壓作用，隨住恩尼斯達都退埋，昔日冠軍功臣剩番沙治奧拉莫斯、布斯基斯等人，好彩西班牙青訓出色，大把新星接棒，今次對比利時大軍名單中，新鮮人就有馬體會21歲中場沙奧尼古斯，另外新一季皇馬彈起嘅翼鋒馬高阿辛斯奧、啱啱落實轉投巴塞嘅新晉前鋒柏高艾卡沙，都算係西班牙未來新星。
不過盧比迪古都唔係一味用新人，今次大軍名單最特別嘅名字就係門將連拿，對上一次代表國家隊已經係2014年，相反就唔選另一位老大哥級門將卡斯拿斯，盧比迪古之前教波圖已經率先棄用卡斯拿斯，西班牙國家隊邊個係人邊個係鬼，大家知。
文：牽牛