N年前，好多中環金融界朋友都有部黑莓手機（BlackBerry）在手，貪佢有個實體鍵盤，打字覆電郵夠方便，但自從iOS、Android系統興起，又有咁多智能手機推出，越嚟越多人脫離黑莓行列。
BlackBerry最出名就係QWERTY鍵盤系列，而佢本身亦有自己一套手機系統，不過確實係太冷門，據統計市佔率連1%都冇。唔少舊用家都話，雖然黑莓方便工作所需，但有時想裝個App打吓機都唔得，所以轉做果迷。
可能為吸大路客，舊年BlackBerry就推出咗Android手機，噚日亦推出號稱「全球最安全」嘅新款手機。唔講真係唔知，BlackBerry仲有宣傳攻勢。咁啱iPhone 7即將推出，唔通係特登提前公開發售搶灘？公司管理層就否認想對撼，只係按計劃行事，亦冇為自己定銷售target咁話。