近日韓國電影《屍殺列車》超級大熱，唔少人睇完都大叫好睇，唔知係唔係韓繼人近來都興火車，早前眼鏡品牌Gentle Monster都以火車車站作主題打造了香港的新店。雖然新店已開了一段短時間，但記者近日剛看完《屍殺列車》再到訪此店就好似特別有感覺。其實新店裝修分成車廂和月台兩部份，「月台」上有設計成售票處的cashier，又有等車坐的舊式座位和電話亭，更有真的可拍即影即有的拍照機。店的另一邊就設計成車廂，兩者之間當然少不了有一個自動「車門」間開，相當特別。「車廂」亦有分開幾個部份，感覺不同於《屍殺列車》中的短途火車格局，而是豪華的長途車廂，有普通座位之餘，更有臥鋪，設計的確和一般眼鏡店非常不同，值得一看。不過Gentle Monster一向玩得，之前的pop-up store就已用過豬肉店做主題，今期《屍殺列車》咁紅，大可試試叫店員們化喪屍妝返工，必定能夠引起話題。
當然，眼鏡店的主角還是眼鏡，Gentle Monster為韓國品牌，更有不少韓星力撐，設計上亦較一般外國品牌更易配合亞洲人臉型，加上款式大多較大路，卻同時又會加入一點點的特色原素，易carry同時又夠特別。不過產品價錢就不算太吸引，不少都要2千多元，但韓星都戴喎，抵番喇。
查詢：Gentle Monster （銅鑼灣蘭芳道25號）
記者、攝影：韓繼聰
