梁振英2012年上台之後，開出「港人港地」期票，卒之現在兌現嘞，啟德區「港人港樓」由發展商中國海外投得，上星期推出樓花，開出呎價一萬四千五百元，「上車盤」最低消費係492萬，有人嫌貴，亦人之常情也。
左丁山由頭到尾都反對港人港地、港人港樓嘅政策，視之為多餘；好多泛民政客係經濟盲，竟然支持，滿以為港人港樓唔准強國人買入，樓價會平啲，簡直儍到上心口，市區樓一定貴，香港人已有足夠鋼性需求買得起，炒得起。現在又有人彈話買樓條件限制多，又係多餘，將來賣番出去嘅話，邊度駛驚冇香港本地人買呀，市區樓噃。
左丁山早已批死，港人港樓不會平抑樓價，只會增加不必要而無效益嘅限制，增加交易費用，現在果然如此。特區政府其實亦知道呢樣嘢嘅，不過係乘機做政治騷嘅啫，將來即使再推出「港人港地」，情況亦是如此。
講起賣地，今天情況係多咗內地資金來港搶地，例如五礦、中糧等等，一位中型地產公司董事最近與左丁山吃飯，閒談中透露一句：「買地難」。何解呀？唔夠長實、新地、恒基、信置、會德豐等大公司搶呀？董事話：「唔係呢，呢班香港競爭對手早已有晒風格、政策，估計佢地出價，比較有把握，但失驚無神有啲內房股嚟競投，出價勇猛，往往超乎預期，投標之時真係好難計數，最新又有四太入市，搶高屯門地價七成，事先又係估唔到嘅。」都係利率太低，資金冇出路之故，如四太呢類有錢人，以前鍾意買現樓收租，現在索性買埋地皮自己發展，你估佢唔到。
地產市道沉寂咗幾個月之後，反彈得幾快，又試恢復暢旺，是否屬於死貓彈？好多分析師都話唔係，以前唱淡話樓市跌三成嘅大行，突然急轉軚睇升，問你服未。左丁山一向以為，在失業率偏低（3.4%）按揭利率（P-3），與通脹期望相比較，借錢供樓竟然係「零利息成本」，歷史罕有，係維持樓市不死嘅最大力量。朋友B最近受經紀催促，往駿景園睇一個細單位（715呎），佢預備買來收租，諗住點都要還一口價，當晚睇完，第二日晨早打電話對經紀講：「叫業主係咁意減價十萬啦！」點知經紀話：「唉，業主昨晚已經收咗票，賣咗嘞，我嘅對手經紀經手嘅！」朋友B為之愕然，估唔到駿景園啲細單位咁搶手也。