難得西川周作去咗踢國家隊，浦和紅鑽嘅副選門將大谷幸輝（小圖）打正選就出醜失波，好在隊友爭氣入兩粒，令紅鑽喺噚晚嘅日聯盃八強首回合作客贏神戶勝利船2:1。
紅鑽有西川周作同柏木陽介踢國際賽而缺陣，但今場踢得唔錯，先由高木俊幸喺六分鐘開紀錄。但點知頂替西川守龍嘅大谷幸輝喺35分鐘犯大錯，佢接應回傳後，喺禁區控一控，諗住大腳斬嗰陣，就被對手前鋒李安度蒙迪拉偷到，射入空門，追成1:1。好在隊友隆比真歷喺41分鐘入波，幫紅鑽再領先2:1。換邊後，勝利船係咁浪費扳平機會，兩個巴西外援仲越踢越躁，李安度蒙迪拉踢跌森脇良太，而柏度祖尼亞走去叫森脇良太快啲起身，被罰第二面黃牌出場。最後，紅鑽維持作客贏2:1。
同日另外三場，廣島三箭主場同大阪飛腳踢成1:1；大宮松鼠主場贏橫濱水手2:1，而FC東京就1:1和福岡黃蜂。