古天樂在今年暑期檔成為「戲霸」，5部電影輪住上，九月繼續有來。拍得多又準，古天樂覺得投入最緊要，「必須要投入，先可以達到快捷。」一眾港產片鐵腳中，劉青雲、張家輝等是愛妻號，古天樂身邊就長期有空位，「有幻想過結婚，但冇乜時間去處理，只係見到面，係冇用嘅。」談戀愛，真的冇得快靚正。
採訪：林妙萍
造型：顏英儀
攝影：郭賢興
攝錄：林德雄、周樂恆
髮型：Dan @ Pi4
化妝：Carmen Man
古天樂專訪在極速的25分鐘內，換了三套衫、完成訪問、影相、拍片，破了add四年來影過100個明星的最快紀錄。影完相，古天樂即時自己搬椅坐定夾咪，一秒鐘也冇浪費，全程冇滲水，和「唔使急，最緊要快！」的港產名句，完全脗合。
鐵膽：投入達到快捷
歷年大大小小訪問，古天樂總不忘提倡團隊精神，他覺得做任何事，團隊投入度是最緊要！「你投入，就會了解到好多嘢，無論工種、創作，你投入就得！好慶幸我哋香港團隊係比較快捷，所以，必須要投入，先可以達到快捷。」常和中韓台不同地區演員、單位合作，古天樂好自豪港隊「快靚正」的優點，「佢哋話，你哋香港人真係快到呢~呢樣真係好難得。」
古天樂暑期檔十套華語片有一半有份演出，《三人行》做督察、《使徒行者》做卧底，今次《S風暴》演廉政專員，港產片總見到他：「香港演員為數唔多，其實唔止我一個係鐵膽，好多個都係。」
新片講警廉矛盾，主題圍繞賭波操盤案，他坦言少睇波亦不賭錢，電影主攻抽絲剝繭式查案，無飛車、跳樓等動作場面，「ICAC呢，第一件事，如果要領槍，係要申請；第二件事，佢係有特定程序查案；第三件事，ICAC查案，係以資料搜集為主，所以，題材已經賦予咗部戲嘅難度。」
家庭：我冇時間拍拖
電影、時裝可以任講，提到拍拖結婚，無點名傳出緋聞的陳喬恩、陳妍希或誰，古天樂都會自動閂閘。「有幻想過結婚，但冇乜時間去處理。你要有時間去相處先得，只見到面係無用嘅。仔女？就更加需要多啲時間啦，有另一半先再講啦。」家事少提，古天樂出名孝順，近月傷眼、傷腰，媽咪可會擔心、失眠？「阿媽唔知我出面做乜，唔係報喜不報憂，係我直情唔話佢聽我做緊乜，拍緊乜戲佢又唔知，明天飛去邊佢又唔知，同埋我阿媽比較忙，朋友多又要唱戲。」
鍾意買衫不是潮男
「好多品牌都鍾意，Givenchy、Balmain、嘩好多喎，近期買咗好多McQueen啦，真係好多牌子，講唔晒。我鍾意買衫，但唔覺得我係潮男。」買衫精古天樂愛出埠買、愛上網買，自命網購成功率奇高，皆因所有新衫都會改完才着上身，「上網最大問題係唔知乜size，不過我好少退，因為買完都會改，唔啱都唔緊要，反正改完先有得着。」衫最緊要要fit身型，銀包內最重要又是甚麼？「銀包最重要係身份證，其次信用卡，八達通我都有，不過我冇用。」
更多精采時尚內容，盡在 http://add.appledaily.com 。