港鐵嚟緊幾個月將會有兩條新綫啟用，公眾都對工程進度特別肉緊，尤其係預計今年年底通車嘅南港島綫，港鐵之前都仲講緊話金鐘站擴建工程緊迫，仍然有趕唔切如期通車嘅風險。可能港鐵都知大家心急，不斷喺facebook專頁公開新車站最新近照，希望等公眾放心啲啦。噚日輪到南港島綫利東站嘅內櫳曝光，車站以橙色為主色，站內牆壁裝設咗兩幅描繪南區漁港景致嘅壁畫（圖），襯番晒鴨脷洲嘅特色。
港鐵仲話，利東站結構工程就已經完成，車站嘅裝修同機電工程亦大致搞掂。但單憑嗰幾張相，網民又點會收貨吖？第一個留言嘅網民就極速柴台︰「呢個站起完有鬼用，咪又係要等埋金鐘站先有得開。」究竟南港島綫幾時先通得車呢？