土地問題雖然嚴峻，但要搬個森林返屋企其實唔難。社企Micro Forests微型森林噚日舉辦「漆黑森林」創作坊（圖），十幾位視障人士同戴咗眼罩嘅義工由導師聲音導航，建造自己嘅迷你森林。
參加者聽從指示，逐步將礦物石、青苔同小裝飾放入透明玻璃罐，噴少少水閂埋個蓋就OK。礦物石提供養份，青苔經光合作用釋放氧氣，蒸發水份又滴番落森林，形成一個微型生態系統。
視障人士顯癸首次造植物手作，原打算整嚟送畀人，講笑話𠵱家唔捨得想自己留起。戴眼罩嘅義工章小姐初時擔心睇唔到整親手，原來唔會，仲體驗到視障朋友嘅世界。設計師周彩紅希望做到傷健共融，專登搵睇唔到都用到嘅工具，並設計着重聽覺同觸覺嘅課程內容，等視障人士亦可體驗綠色藝術。