每逢大賽之後，都係國家隊嘅換帥潮，今年有美洲盃同埋歐國盃，換帥特別多，巴西同阿根廷兩大南美勁旅都換咗教練，而歐洲方面，就有意大利、比利時、英格蘭同西班牙等。呢個周末係新球季嘅首個國際期，大家可以留意吓呢啲國家隊換帥後有乜改變。
牽牛兄話想介紹西班牙新帥盧比迪古，小弟都睇吓呢位仁兄嘅資料，一睇就不由得讚嘆西班牙足協選帥得當。
小弟睇到嘅唔係佢教過各級小國腳，而係佢嘅球員生涯，佢係少有踢過皇家馬德里同巴塞隆拿兩大死對頭嘅球員。皇馬同巴塞嘅球員喺聯賽、歐聯打餐死，但佢哋亦係西班牙國家隊嘅骨幹，所以團結兩大陣營係「狂牛」主帥嘅首要任務。以前迪保斯基喺度，通過卡斯拿斯同沙維，將兩派收服得妥妥貼貼。家陣老帥走咗，沙維退咗隊，卡斯又淡出，要鎮住兩派，一係搵個權威鐵帥，一係就搵個「太極」高手，盧比迪古雖然教波份CV唔算好靚，但關係上有先天優勢，踢過晒兩大班霸，同兩派球員都有偈傾，所以狂牛足協請盧比迪古嘅決定相當有政治智慧，可以平衡到兩幫人。
香港咁多人撐英格蘭，點都要講吓艾拿迪斯嘅。點解決朗尼（圖）位置問題，既係曼聯領隊，亦係英格蘭主帥嘅最大煩惱。艾拿迪斯遇着摩連奴，實行順勢而行，「摩規艾隨」，跟風搵朗尼踢10號，既避到外界對朗尼位置嘅質疑，有乜就話朗尼喺曼聯都係咁踢，同時穩住呢位更衣室大佬，控制住隊波。不過，曼聯有伊巴謙莫域、保羅普巴去分擔朗尼嘅工作，避免朗尼過多上腳，暴露控球退步嘅缺點，唔知英格蘭嘅哈利卡尼同拉爾拉拿做唔做到呢樣嘢呢？
文：咖喱