開學後好多人患上「暑假後遺症」，想繼續去玩，西九自由約返嚟嘞，今個月11號喺西九苗圃公園舉行，除咗有戶外band show外，今年仲大玩童年回憶，舉辦紙飛機大賽。新項目仲包括孩子市集，由細路做檔主，據講繁忙兒童合唱團劉小華都有報名，會開影相舖做攝影師，幫大家留倩影。
新一輪自由約逢每月第二個禮拜六或日舉行，直至下年3月為止。頭炮係9月11號下午，以「聚合離散」為主題，表達香港係一個多元嘅城市，有非洲樂隊表演原創非洲搖滾音樂、台灣「生祥樂隊」以客家話表演、潮汕南澳島「玩具船長」以方言演唱，當然唔少得有本地樂隊唱番廣東歌啦。
新增孩子市集
新活動包括「紙飛機切磋大賽」，30隊人用A4紙摺紙飛機比拼，主辦單位又設立造型獎同打氣獎，無報名嘅市民歡迎賽後加入切磋。另一新活動係「孩子市集」，最細檔主只有3歲，製造人工番𤩹出售，亦有細路收集菜頭做印章。市民除咗幫襯細路，仲可以去插畫家「含蓄」嘅攤檔寫低心聲，無論政治口號「香港獨立」定無厘頭字句，含蓄都會幽默咁用插畫演繹。
對於西九第三期工程未有足夠經費，西九文化區管理局行政總裁栢志高噚日話，第三期工程仲傾緊，唔期望政府揼水，會研究公私營方式集資。
李八方
mailto:[email protected]