蘇甲球會昆士柏喺網上宣佈，簽入重量級射手費格遜！真係前曼聯領隊費格遜，但爵爺已經74歲，梗係唔係去踢波啦，而係幫昆士柏宣傳佢哋件150周年紀念波衫。
昆士柏喺1867年成立，係蘇格蘭歷史最悠久嘅球會；費格遜球員時代就喺昆士柏出道，所以佢都好樂意幫母會宣傳，「當昆士柏接觸我，話想搵我幫手推廣新波衫嗰陣，我好開心。」費格遜喺1957年至60年間踢過昆士柏，之後效力過聖莊士東、格拉斯哥流浪等球會，係當時蘇格蘭響噹噹嘅射手！喺「六七暴動」期間，費格遜仲代表過蘇格蘭嚟香港友賽，喺大球場入過兩球波㖭！周不時都聽到有啲偽球迷將費格遜歸類去踢波唔掂、但教波掂嘅領隊，家陣趁呢個機會澄清吓，費格遜係踢波掂，教波更掂。另外，間中喺網上都有人討論中場同後防先出到世界級教練，踢前鋒難啲，但費格遜正正係一位頭槌了得嘅前鋒。