上月初出任政府新聞處處長嘅黃智祖（Joe），坐暖處長呢個位開始四出活動，噚日出席東華嘅午宴。皆因呢次以「耆」力無窮為主題嘅午宴，請咗由年輕長者組成嘅無伴奏樂隊Upbeat獻唱，東華就邀請Joe同主席一齊上台。Joe好快就琅琅上口同樂隊輕鬆合奏，獲得唔少掌聲。八方問處長有冇袋定幾支金曲行走江湖？佢笑稱唱歌唔係好得。佢致辭時慶幸四「美」相伴：美景、美食、美聲同美樂。點解有美景？皆因午宴場地係新落成嘅安老綜合中心，位於黃竹坑南朗山道，有海景㗎！