世盃外亞洲區12強賽禮拜四展開，被編入A組嘅國足首戰作客南韓，佢哋喺禮拜一就抵達首爾，當地酒店仲鋪埋紅地氈嚟歡迎佢哋，國足為安全起見，仲包起酒店嘅10樓，搵幾個保安駐守㖭。國足自知實力弱，由上星期一起就喺瀋陽集訓，操足成個星期。呢次國足除咗有鄭智、張琳芃呢班慣常國腳外，仲召咗踢荷甲維迪斯嘅前鋒張玉寧。相反，南韓備戰時間較少，星期一先至齊人操練，但主力孫興民話只要磨合三日就夠。