中國嘅里奧女子100米背泳銅牌得主傅園慧，講咗句「洪荒之力」再加埋古靈精怪嘅表情而爆紅，即使冇金牌都可以跟中國奧運精英代表團而嚟香港，𠵱家就去咗澳門。佢唔單止受香港人歡迎，就連真人騷《人在野》主持貝爾（Bear Grylls）都係佢粉絲，仲發戰書邀請佢參加《名人荒野求生（Running Wild with Bear Grylls）》㖭。若然傅園慧應承參加，大家咪會有機會見到佢食蟲囉？
貝爾微博下戰書
貝爾日前喺微博度話，會喺國內製作真人騷《名人荒野求生》，仲發戰書邀請「洪荒少女」傅園慧參加。貝爾咁話：「傅園慧係中國游泳新星同埋奧運獎牌得主，亦係個樂觀開朗、古靈精怪嘅小姑娘。妳活潑勇敢嘅性格同埋超卓嘅運動能力，同樣受我關注，我知妳喺背後付出咗幾多。我好奇妳喺自然荒野中究竟會係點。我同埋干超導演誠邀妳嚟挑戰大自然，向世界展示中國年輕一代嘅活力、自信、樂觀同埋正能量。妳已經征服咗個泳池，家陣仲有個大自然等妳去征服。妳肯唔肯用妳嘅洪荒之力去接受我嘅挑戰呀？」
20歲嘅傅園慧亦有喺貝爾嘅微博留言：「嘩！正呀！」呢次對話引起咗好多網民友熱烈討論，唔少人都期待「洪荒少女」可以用洪荒之力挑戰大自然，有人仲搞笑話想睇傅園慧食蟲㖭呀！由於傅園慧正進行奧運訪問，未有時間作正面回覆，但如果佢真係參加嘅話，貝爾呢輯《名人荒野求生》肯定好高收視囉。
