選舉令人瘋狂，候選人應該最清楚。喺新界東參選嘅方國珊（圖），根據港大滾動民調喺入局邊緣徘徊，生死未卜，令佢都盡地一煲，宣佈今日起至選舉日舉行「展決心，瞓盡為民生」行動，連續四晚喺新東四大區，包括沙田大圍、大埔、粉嶺、將軍澳瞓街過夜。而佢每晚瞓街期間，仲會喺晚上10點至凌晨1點進行政綱討論，歡迎市民詢問佢嘅政綱同理念。嘩，真係為咗議席博到盡喎！
點解拉票拉得咁徹底？相信同佢多次與立法會議席擦身而過有關。佢話之前敗選，係因為自己缺乏大黨資源協助，但從冇後悔，而今次參選係要做「最後衝刺」，力爭新東無黨派嘅關鍵一席，堅稱自己無政黨包袱，可以為市民企硬發聲。唔知呢位新一代「瞓街珊」，可唔可以憑此壯舉取代同區嘅「瞓街卿」？
該區其他參選名單，請參閱本報立會選戰網站 http://hk.apple.nextmedia.com/legco2016/region