9月4日對香港人嚟講，梗係重要啦，因為嚟緊新一屆立法會，非建制陣營係咪可以守住三分一關鍵否決權？就睇選民呢一日投乜票。而梁班子中至少有一個高官冇得投票，唔係因為冇登記做選民，而係因公務出差，八方講嘅係財政司司長曾俊華，皆因佢會代表特區政府，出席9月4日喺杭州舉行嘅二十國集團G20峯會。
奧巴馬等各國元首雲集
八方問過財爺辦，證實鬍鬚曾9月3日啟程，換言之身為港島區選民嘅佢，無緣投票。嗱，普通市民或者覺得無得投票，真係陰功豬，但如果大家知道鬍鬚曾出席呢個峯會係咩料，可能覺得佢反而係執到支好籤。話說北京政府高度重視呢個G20峯會，主席習近平更加會出席兼主持峯會，其間仲要各國元首雲集，包括美國總統奧巴馬都會現身，層次相當高，鬍鬚曾代表出席都算身份象徵。
而大家嘅焦點，當然落喺習大大會唔會同鬍鬚曾，再次上演「習握手」嘅震撼場面？尤其喺特首跑馬仔賽事越演越烈之際，阿爺任何些微身體語言，都已經令大家無限猜想。睇番吖，連左報《成報》都喺頭版以評論文章鬧爆梁振英，證明凡事沒有不可能。諗落冇票投但有機會見到習大大，都唔係好陰功啫，有人可能好葡萄㖭呢！
李八方
mailto:[email protected]