美網周一開打，中國金花就好搶鏡，王雅繁、段瑩瑩同鄭賽賽都喺女單首圈贏波，其中鄭賽賽最威，淘汰咗里奧女單金牌得主、波多黎各球手佩芝，仲係直落兩盤贏6:4、6:2㖭。
不過，中華台北嘅謝淑薇首圈出局，以0:6、5:7輸畀烏克蘭球手邦達蓮歌。另外，法國網球手莫菲斯喺男單首圈對盧森堡球手基利斯梅拿嗰陣，意外撞落場邊個電子鐘，好彩冇受傷，但個鐘就俾佢撞到散晒，最後佢贏6:4、6:2、7:6晉級。
