今個禮拜日就係選舉日，好緊張啊，究竟邊個會當選金融服務界議員呢？其實，邊到華華緊張吖？我都冇得投票。不過有份投票嘅，呢個禮拜最後衝刺，就可能坐立不安嘞。
噚日Now TV引述消息，話出動到中聯辦官員，去到中資證券業協會，幫競選連任嘅「肥老闆」張華峰拉票，仲分析埋三名候選人優劣，講咗句意味深長嘅說話：「張華峰做的部份事情，是外界看不到的。」唔……究竟係咩意思呢？
華華噚日試過搵中資證券業協會會長譚岳衡，又電郵問過協會，到截稿前都冇回覆，搞到成件事好鬼耐人尋味。一國兩制咁緊要，如果中聯辦真係有官員現身拉票，就真係好大件事了。肥老闆嗰邊話「邊有咁嘅本事」。
不過挑戰者詹劍崙（Ricky）就好緊張，急急腳今日下晝開記者會，話要回應不實謠言、制定反對（證監會、聯交所上市架構）諮詢文件嘅行動綱領，同埋重申政綱內容，維護業界利益。雖然Ricky話，唔怕中聯辦疑似幫對手箍票，又話自己好有信心，但始終有花生友掩住半邊嘴笑，睇死Ricky係告急拉票喎。
金融服務界候選人尚有徐聯安。