中資公司開記者會向來有獨特方式，好似內房恒大（3333）就喜歡接載內地傳媒來港參加記者會，佔據晒發問時間，噚日會後本港記者繼續追問副主席夏海鈞時，情況慘過行年宵，更有位纖弱女行家俾保鑣逼到埋牆兼拉扯咗幾吓，好陰公呀。
唔知係咪怕記者們嬲嬲豬，原本一直唔肯答記者有關萬科（2202）提問嘅夏海鈞突然好識do，叫公關問港媒係咪仲有問題，可以喺開分析員會前畀多5分鐘大家。
夏海鈞仲不停叫大家「來吧，來吧，有甚麼問題，給你們優先開場」，前後都講咗三分幾鐘，仲話希望大家「沒甚麼意見」。
其實噚日恒大業績會已叫有改善，比起以往封殺港媒，都有兩三間港媒成功搶灘，難得係副主席親自出場解決一場關公災難，公司公關真係要學嘢喇。
講開又講，恒大噚日順手公佈，由上市一直做財務總監（CFO）嘅謝惠華辭任，轉去做恒大金融集團常務副總裁，恒大CFO就由潘大榮內部晉升。