力爭港島區最後一席嘅白鴿黨候選人許智峯（圖），日前為咗拉票不惜殺入傳統建制派票倉嘅北角春秧街，身為廣東新會人嘅阿峯笑笑口話，本來一句福建話都唔識，好在有一個福建黨友教路，令佢可以同福建人打招呼，憶述當日拉票反應唔錯！
阿峯用福建話拉票時，講嘅內容都係話：「我係許智峯，請大家投票支持」，全程唔使其他人提水，比起月初同區用福建話拉票、但要義工即場教福建話嘅工聯會候選人郭偉強似乎更淡定。
有聽完阿峯表演福建話嘅網民就話，福建人好多都係喜愛民主，叫阿峯友善對待佢哋，相信都會獲得支持；亦有自稱係福建人嘅網民留言話會撐阿峯。
八方唔知阿峯今次可以喺紅區攞到幾多票，但好明顯佢獲鄭經翰支持，因為佢嘅facebook貼咗張同大班嘅握手照，阿峯強調會全力應戰。
該區其他參選名單，請參閱本報立會選戰網站 http://hk.apple.nextmedia.com/legco2016/region